அம்மா மரணம், சின்னம்மா சரணம்!

அம்மா,
மண்ணுலகை விட்டு விண்ணுலகை ஆள நீ புறப்பட்டு இன்றோடு 30 நாட்கள்,
இந்த ஒரே மாதத்தில் ஊருக்கே தெரிந்து விட்டது  உண்மையிலேயே யாரெல்லாம் உன் ஆட்கள்!

தலைவனின் நூற்றாண்டு விழாவுக்குத் தலைமையேற்கத் தான் நீ போய் விட்டாய் என பட்டுக் கொள்கிறோம்  நாங்கள் ஆறுதல்,
ஆனால், கண் முன் நடப்பதையெல்லாம் பார்க்கையில் ஆட்சியே கைமாறி விடும் போல, இல்லாமலேயே தேர்தல் !

உன் இழப்பை மனம் கொஞ்சமும் ஏற்க மறுக்கிறது,
உடன்பிறவா சகோதரியை  வரலாறு காணாத வகையில்  ஊரே வெறுக்கிறது!

‘மக்களால் நான், மக்களுக்காகவே நான்’ என்று மேடைதோறும்  நீ  கலங்கினாய்,
‘சின்னம்மாவால் தான்  நாங்கள், சின்னம்மாவுக்காகவே நாங்கள்’ என  இன்று முழங்குகிறார்கள்!

மன்னார்குடியை அன்றே மண்ணைக் கவ்வ வைத்திருக்கலாம், நீயோ மன்னித்து உள்ளே விட்டாய்,
விளைவு -  கையில் மாங்காயைக் கொடுத்து விட்டு கட்சியை  ஏப்பம் விட்டு விடும் போலிருக்கிறது மாஃபியா கும்பல்!

அப்போலோவில் 75 நாட்கள் உனக்கு என்னதான் நடந்ததோ? கடவுளுக்கே வெளிச்சம்!
இதனால் தூக்கம் தொலைத்த உன் விசுவாசிகளுக்கு இல்லை இதுவரை சுபிட்சம்!

உனக்குத் தெரிந்தால்  அங்கு  உன் தலைவனிடம் சொல்லி அழுது விடு,
காலத்திற்கும் பெண் சிங்கத்தின்  புகழ் பாடிக் கொண்டே எங்களை இருக்க விடு!

இருந்த வரை நீ தான் எல்லாமும் ஆனாய்,
மறைந்த மறுநாளே சசிகலாவே சகலமும் ஆனார்!

33 ஆண்டுகள் உன்னைப் பின் தொடர்ந்த நிழல்,
ஆண்டவன் தீர்ப்பால் சீக்கிரமே போகும் புழல்!

-மோகனதாஸ் முனியாண்டி #சிந்தித்தவேளை